最近工作繁忙，經常攪到好夜先返屋企，沖過涼上下網又要提自己快啲訓覺，第二朝早又要起身返去做野。繁多既工作量做到個人開始麻目左，累到個人唔想講野，工作上既難題令我個腦24小時不停運作，無一刻係休息過，停低過。
琴晚深夜，帶住疲倦既身軀返到屋企樓下，突然間唔想返屋企，好想透下氣，腦海一片空白，無啦啦走到去附近一間七仔，對住店務員講左一句十幾年都無講過既說話:
『唔該一包純薄曼。』
對上一次買煙既時侯已經去到讀中二既時侯，果陣群埋班MK仔，比佢地引誘去食煙，試左幾支煙後，發覺真係又貴又難食，完全唔知有咩咁好食，最後就無再食。但依一刻，竟然不知覺咁買左包煙，一個人走到公園坐。
『唉。』
嘆左一口氣，總結一下近排既辛酸。望住包煙，個腦有好多想法，係唔係我自己都覺得壓力大到要去食煙減壓? 而食煙真係可以減到壓?
諗諗下，有個著住西裝既後生仔走黎問我:『有冇火機借黎?』
我將岩岩順便買埋既火機借比佢，佢點著左支煙後，講左句唔該就企埋一邊，背住我一路食煙一路望住個天，似乎滿懷心事。
個刻，我先發現，原來公園仲有其他人同我做緊同一樣野，大家都獨自面對緊自己既問題，辛酸，壓力。同樣地，大家都好想搵一個可以透下氣，放鬆一下自己既地方。
坐低諗下頭先去左一個中學同學攪既Gathering，雖然工作量令人喘不過氣，但為左放鬆下自己，我都堅持出席，順便聚下舊。席上有好多昔日既同學都踏入社會，有自己既工作，有老師，有警察，有社工，有文員。
開頭大家都係講返中學時期既攪笑野，講講下，做老師既阿軒突然同我地呻左幾句:
『唉，最近返工真係好辛苦，改卷同準備通識既野攪到晚晚八點幾先返屋企，第二朝仲要早過啲學生返學，而且......』
阿軒都未講完，席上做警察既阿豪即時反駁:『你都叫辛苦? 你成日都有假期，改卷都係跟答案改姐，有幾辛苦呀? 我日日著住啲裝備去行咇知唔知幾重呀? 仲要日灑雨淋.....又要成日比人問侯! 我就真係辛苦啦!』
接著其他人又反駁:『嘩! 行下街，查下身份證就袋差唔多兩皮野人工，你都叫辛苦?』
做社工既阿敏又趁機呻下:『我手上有超過八十件Cases，又要攪活動又要寫中心Proposal，我就黎崩潰啦，我真係做唔到咁多野......』
接著其他人又反駁:『嘩! 做社工同人傾下計，玩下遊戲都叫辛苦? 咁我地果啲又算咩?』
做文員既又呻下:『我最近都好辛苦，由於就黎暑假，有好多訂單要出貨，晚晚都要OT，仲要無補水.....唉!公司又唔請多啲人，真係做死我!』
接著其他人又反駁:『嘩! 朝九晚五既工你執到啦，又有冷氣，又有得坐，玩下電腦就收工! 你辛苦啲咩呀?』
我坐係到望住整個情境，不知不覺間，席上既人都係到鬥慘，好似其他人既辛苦永遠都比唔上自己既辛苦，各人都將自己既痛苦不斷放大，務求可以得到最終既勝利者，得到別人既體諒同關心。
個刻，我原本想呻下自己最近既事，都決定吞一吞口水，將苦水收返埋係個心到。到最後，各人都意識到無人明白到佢地工作上既辛苦同壓力，只好搵返同行黎呻，做老師既，搵返老師呻，做警察既，搵返警察呻，做社工既，搵返社工呻，做文員既，搵返文員呻。
我見到咁既情況，突然間覺得大家都好可憐，就好似返到屋企唔會同屋企人講返工既事，永遠選擇沉默，將心事收埋係個心入面。
因為，反正講出黎都無人會明白。
其實當我地想吐下苦水，講下自己煩惱既時侯，都唔會期望對方會比到啲咩解決方法比我地，而我地要求好簡單，只係想有個人可以靜靜地聽哂我地所講既野，講一句加油鼓勵說話就已經足夠。
但又有幾多人真係可以做到一個稱職既聆聽者呢? 你地又試過真係全心全意咁聽哂朋友既訴苦呢?
係公園到，我望住包煙，我望唔透將來。
唉左一聲，就掟左落垃圾桶，始終覺得用食煙黎減壓係一個惡性同唔健康既循環。
當我準備返上返屋企時，不自覺轉身望住其他係公園『透氣』既人說一聲:『共勉之。』
Search